• Әуез
• 24 Тамыз, 2021

Айлун «Бақытты бала» байқауында топ жарды

7–11 тамыз күндері Ақтөбеде талай таланттарды түлетіп, жұлдызын жаққан «Бақытты бала-2021» халықаралық фестиваль-байқауы өтті. 2018 жылдан бері Димаш Құдайберген мен «ДимашАли» шығармашылық орталығының жетекшілік етуімен ұйымдастырылып келе жатқан тартысты додаға 200-ден астам өтініш келіп түскен. Ақтық сынға кіл мықты 20 өнерпаз жолдама алды. Оның ішінде жетеуі өзге елден.

Атап айтқанда, ауқымы жыл сайын кеңейіп келе жатқан ән байқауына қатысушылар сонау Грекия, Болгария, Әзербайжан, Украина, Ресей, Польша елдерінен және Қазақстанның әр түкпірінен жиналып, өнерін ортаға салды. Сен тұр, мен атайын деген жас өнерпаздардың арасында тараздық 13 жастағы дарынды Айлун Заушева топ жарды. Гран-при иегерінің шығармашылық жолға қалай бет бұрғанын сұрап білдік.

– Айлун, өнер жолына қалай келдің?

– Мен Тараз қаласының тумасымын. Шона Смаханұлы атындағы №44 орта мектептің 8-сыныбында оқимын. Ән айтуды үш жасымнан бастадым. Өнерге қызығу анамнан дарыған. Осы жолда басқан әр қадамымды қолдап, шабыттандыратын жан да анам. Жеті жасымнан бері үлкен сахналарда өнер көрсетіп, түрлі байқауға қатысып келе жатырмын. Ең алғаш Алматы қаласында өткен «Арман бастауы» атты ән додасында көпшілікке таныс Жанар Дұғалованың «Ізін көрем» әнін орындап, бас жүлдені иелендім. Байқауға толықтай анам дайындады. Сол сәттен бастап жеңіліс пен жеңіс қатар жүретін өнер майданында батыл, қайтпас қайсар мінезді болу керек екенін түсіндім. Сегіз жасымда «Бала дауысы-2016» байқауында бақ сынадым. Республика сарайында Жамбыл облысының атынан өнер көрсеттім. Бұл өмір жолымдағы биік көрсеткіштердің бірі ретінде есімде қалды.

– «Бақытты бала-2021» байқауы туралы айтып берсең. Іріктеуден өткенде қандай сезімде болдың?

– «Бақытты бала» байқауымен 2018 жылдан бері таныспын. Бағымды сынап көрсем деген арманым болды. Іріктеуге келер болсақ, өтінім тастаған соң жауабын асыға күтіп, әлеуметтік желіні үнемі бақылаумен болдық. Өткенімді білген сәтте қандай сезімді бастан кешіргенімді сөзбен айтып жеткізу мүмкін емес. Осылайша, таңдау таразысынан сүрінбей өткен жиырма қатысушының арасынан топ жарып шығуға барымды салдым. Бірінші кезеңде маған талай рет жеңіс сыйлап, құт әкелген «Ізін көрем» әнін, екінші кезеңде «Never enough» әнін шырқадым. Айта кету керек, уақыттың тығыздығына байланысты дайындыққа небәрі бір жарым ай уақыт болды. Оның үстіне ұстазым сырқаттанып, жаттығу жұмыстарын анаммен жалғастыруға тура келді. Бағыма орай анамның музыка өнерінен хабары бар. Ол үлкен сахналарды бағындырған әнші болуды армандаған. Болашақта өзі жетпеген биікке менің жеткенімді қалайды.

Қорытынды кеште сахнада тұрып жеңісімді естігенде қуаныштан жылап жібердім. Әлем танитын Димаштай ағамыздың байқауында жеңімпаз атану үлкен мәртебе екенін айтпағанда, екі күн бойы ең мықты деген қазылардың алдында өнер көрсетудің өзі мен үшін жетістік. Бұл менің Димаш Құдайбергенмен екінші рет кездесуім. Танымал өнер иесі қатысушыларды қарапайымдығымен баурап алды. Осы тұста байқаудың жоғары деңгейде өткенін атап өткім келеді. Ұйымдастыру-шылар әр күніміздің қызықты өтуіне жағдай жасады. Бұл мекенге алғаш рет табан тіреуім.

Ақтөбе қаласының тарихи-мәдени жерлерін тамашалап, керемет әсер алдық. Тараз қаласымен ұқсастықтарын да байқадым. Ең бастысы, Қазақстанның түкпір-түкпірінен ғана емес, шетелден келген қатысушылармен танысып, жақын достасып кеттік. Олардың арасында бұрын бір сахнада өнер көрсетіп, қарсылас болған өнерпаздар да болды. Байқаудың артықшылығы да осында деп білемін. Тартысты сынға қатысып қана қоймай, талантты дос табуға мүмкіндік мол. Мойындайтын дүние әр елдің, әр облыстың намысын қорғап келген талантты қыз-жігіттердің бәрі де мықты, бәрі де жеңіске лайық.

Айлуннан кумирі жөнінде сұрадық. Қазақ ән өнеріне еңбегі сіңген барлық тұлғаны құрметтейтінін жеткізді. Сондай-ақ, бірнеше аспапта еркін ойнап, спортпен шұғылданғанды жаны сүйеді екен.

– Спортқа жақынмын. Әсіресе волейбол ойыны қатты ұнайды. Ән айтумен қоса бірнеше аспапта ойнаймын. Әнші ең алдымен фортепианода ойнай алуы шарт. Қазақтың ұлттық аспабы домбыра тарту да қолымнан келеді. Патриоттық бағыттағы әндер мен халық әндері жаныма жақын. Бірақ бұл өзге тілде ән шырқай алмаймын деген сөз емес. Жезтаңдай өнер иесі кез келген туындыны нақышына келтіре орындай білгені дұрыс. Сондай-ақ, қазақ эстрадасындағы барлық әншінің өнерін бағалаймын. Үлгі тұтатын тұлғам деп Димаш Құдайберген мен Жанар Дұғалованы, шетелдік жұлдыздардан Бейонсе және Ариана Грандені айтар едім. 

Болашағымды өнер жолымен байланыстырамын. Өзге салаға бет бұру туралы ойлаған да емеспін. Қазақ атын төрткүл дүиеге танытатын біртуар өнер иесі болғым келеді. Ең үлкен арманым – жеке кешімді беріп, анаммен бірге ән айту. Алдағы уақытта ресейлік «Голос дети» және Junior Eurovision-2021 байқауларына қатысуды көздеп отырмын. 

– Сұқбатыңа рақмет, Айлун. Армандарың орындала берсін!

P.S. Сұқбат барысында 13 жастағы Айлунның сөз саптау мәнеріне сүйсіндім. Талантты қыздың сөзі анық, мақсаты айқын. Болашағынан үміт күттіретін өнерпаз секілді сен де өз арманыңа қол жеткізе аласың, жас дос. Тек алға!

Назерке Өтеген, 
Қ. Жұбанов атындағы АӨУ филология факультетінің 3-курс студенті.

«Ұлан» газеті, №34
24 тамыз 2021 жыл